Temas

Prácticas para coidar a hixiene de oídos nos bebés

14/04/2021 · Recomendacións

A limpeza de oídos é importante a calquera idade pero un pouquiño máis se cabe nos primeiros anos. Os oídos dos máis peques están aínda formándose e crecendo e necesitan un coidado máis minucioso, así como estar máis atentos por se se puidese dar algunha anomalía no seu funcionamento. Se se é nai ou pai por primeira vez é normal que se teñan máis dúbidas acerca de como limpar de forma correcta os oídos do/a neno/a, polo que aquí vos deixamos algúns consellos. 

Consellos para limpar de forma correcta os oídos dos máis pequenos

Limpeza superficial: en ningún caso deberemos limpar diariamente os oídos dos bebés. Non soen ter moita sucidade polo que unha limpeza superficial debería ser suficiente. Bastará con empregar un pano húmido despois do baño (facendo movementos de dentro cara fóra) e sempre naquelas zonas nas que poidamos acceder facilmente. Tamén o pasaremos polos pliegues da orella. 

Revisar a cera: que teñan unha pouca cera tamén é normal, lembremos que é unha forma de autolimpeza que ten o propio oído e que ademais o protexe de infeccións. Tan só nos deberemos preocupar se a cor desa cera se volve máis amarelenta do normal, máis escura, porque se podería tratar precisamente dalgún tipo de infección. 

Non introducir obxectos: introducir gasas ou bastoncillos podería ser perigoso porque, en vez de extraer o exceso que se poida dar de cerume poderiamolo empuxar cara o interior do conduto auditivo e causar tapóns. E o que é máis grave, poderíamos chegar a provocar perforacións no tímpano, algo que se volve moito máis sinxelo tendo en conta os movementos involuntarios que os peques fan ca cabeza. 

Limpeza dos oídos cando son un pouco máis maiores: cando teñen máis meses podemos ir lavando un pouquiño máis os seus oídos na hora do baño. Poderemos introducir unha pouca máis de auga pero sempre tendo en conta que non pode introducirse no pavillón auditivo. Xiraremos a cabeza da/o nena/o cando lle lavemos a cabeza e logo secaremos ben as orellas cunha toalla de algodón.

Protexer os oídos do frío: en inverno ou días con baixas temperaturas deberemos poñerlles gorros que tapen as súas orellas cando saiamos con eles á rúa.

En épocas estivais: se levamos ós máis pequenos á piscina ou á praia, non pasa nada se lles entra algo de auga pero tampouco é recomendable que entre demasiada porque se queda algunha estancada dentro do oído pode desembocar en fungos ou infeccións. 

Ruídos fortes: os oídos dos/as nenos/as están aínda formándose, polo que temos que ter moito coidado á hora de expoñelos a fortes ruídos. Convén non telos preto de sons estridentes ou moi fortes como os propios de concertos ou bares. 

Control polo/a especialista: o pediatra xa nos pautará sobre as revisións que se lle deben facer ó neno ou nena conforme vai medrando pero aínda así teremos que prestar moita atención ante calquera comportamento estraño. Por exemplo, un dos claros signos de que o noso bebé non escoita ben é que non xire a cabeza ante os ruídos cando xa ten idade para facelo. 

¡Compártelo!