Ca chegada da primavera e o cambio das temperaturas, a todos nos apetece pasar máis tempo fóra da casa e realizar actividades ó aire libre. Porén, moitas outras persoas relacionan tamén esta etapa do ano con outro asunto menos afable: as alerxias. As alerxias veñen sendo reaccións do organismo a axentes externos que este considera daniños. A máis habitual é a alerxia ó pole procedente de arbustos e árbores. Cada vez é máis habitual observar as rúas tinguidas de amarelo e masas de aire cargadas destas partículas.
Pero, como chega a afectarlle isto á nosa audición?
Os síntomas máis habituais cando se padecen alerxias aféctanlle ó sistema respiratorio: picor nasal, esbirros, conxestión nasal... ou outras como picor de ollos, lagrimeo ou secreción de mucosidade. Todos estes síntomas poden levar a complicacións respiratorias e episodios de asma. Isto soe afectarlle máis ós nenos/as e ás persoas maiores dado o seu maior grao de vulnerabilidade, pero cada vez é algo que lle afecta a máis xente e de diferentes rangos de idade.
Como xa sabemos, os oídos están directamente comunicados ca nosa boca e nariz, polo que se esta mucosidade que vimos de citar aumenta ata niveis considerables, pode provocar obstrucións e facer que o oído resulte danado. As trompas de eustaquio, que son as que conectan os oídos medios ca parte de atrás da gorxa, pódense ver inflamadas e isto provocar que a ventilación do oído medio se vexa afectada chegando a causar a famosa otite. Así, o oído medio pola súa parte reaccionará ca segregación dunha mucosidade que tapona os oídos, afectando isto directamente á capacidade de escoita.
Se esta mucosidade non é tratada e segue en aumento, as molestias poden agravarse chegando a causar máis dor e supuracións na zona media do oído.
Que facer para coidar a audición durante estes episodios de alerxias primaverais?
O máis importante para protexerse destes episodios é tomar pequenas e lóxicas medidas no día a día.
- Teremos que saber a que tipo de pole é máis sensible o noso organismo e cando é a época de máxima floración para tratar de resgardarnos máis durante eses días.
- Se fai moito vento, é mellor evitar actividades ó aire libre porque nos estaremos expoñendo moito máis.
- Ter coidado co aire acondicionado e revisar continuamente os filtros de aire.
- Se estamos na casa, manter as ventás pechadas durante os días máis críticos ou de máis vento.
- Tamén é recomendable o emprego de lentes de sol pois actuarán como barreira ante esas masas de aire cargadas de pole.
Se pasada a época de maior concentración de pole continúas tendo molestias nos teus oídos, deberás consultar cunha/cun especialista para buscar o problema e dar ca solución. En caso de non tratar esa perda auditiva, os danos pódense agravar e incluso chegar a ser máis complicados de eliminar.