O primeiro erro que cometemos é asociar a presenza de cerume ca sucidade ou falta de hixiene. Pero isto non é así. O cerume é unha substancia natural que produce o noso corpo co obxectivo de protexer ó oído. Non podemos tratar de eliminala por completo posto que estariamos deixando os nosos oídos sen protección. Esta cera actúa como un auto-limpador para salvagardar os oídos da sucidade que lle poida chegar do exterior como por exemplo o polvo. Ademais, esta cera tamén xera hidratación ó longo de todo o conduto.
Esta falsa crenza de que a cera é sinónimo de falta de hixiene fai que moitas persoas se obcequen en loitar contra ela, derivando isto en prácticas daniñas para os oídos. A máis habitual é o emprego dos famosos bastonciños. Pero, por que son tan malos?
- Non eliminan a cera, senón que a empuxan cara dentro do oído. Isto pode implicar graves problemas no tímpano ou no canal auditivo. Nos casos nos que os introducimos na parte máis interna poden chegar a causar infeccións, zumbidos, perdas auditivas, picores ou outro tipo de complicacións.
- Se os empregamos con moita frecuencia, podemos chegar a irritar o conduto auditivo e desembocar isto na compacticidade da cera.
- A composición do propio bastonciño tamén é perigosa porque pode desprenderse del algún anaco de algodón e quedar atascado no canal auditivo.
En definitiva, os bastonciños só deben empregarse para limpar o oído externo ou nin sequera, posto que unha vez que saímos da ducha, se limpamos o oído externo cunha toalla é suficiente. No caso de que se nos acumule unha cantidade excesiva de cera teremos que consultar ós especialistas para que nos indiquen que facer.
Pero ademais, os bastonciños son tamén moi prexudiciais para o medio ambiente porque, ó igual que as toalliñas, impiden a correcta depuración da auga. Isto, sumado ás súas contraindicacións a nivel sanitario fixo que en moitos países xa se decretara ou se estea en vías de facelo, a súa prohibición.