A boa alimentación é un dos mellores hábitos para traballar a nosa calidade de vida. Comer ben reporta innumerables beneficios para a nosa saúde. De feito, fálase continuamente de que se consumimos de maneira habitual certos alimentos, estes poden axudar a sacar máis rendemento dos nosos sentidos e facultades físicas e mentais: a vista, a memoria, a atención e, tamén, a audición. Neste artigo falarémosvos daqueles alimentos que máis beneficios lle reportan á nosa saúde auditiva.
Audiólogos especializados neste campo afirman que unha dieta equilibrada e o consumo de certas vitaminas e nutrientes poden retrasar ou incluso prever futuras perdas auditivas. No sentido contrario, o consumo doutro tipo de vitaminas pode chegar a provocar infeccións nos oídos e a longo prazo desembocar en enfermidades auditivas máis graves, tanto en adultos como en nenos.
Enumeraremos a continuación aquelas vitaminas que fortalecen o sentido auditivo:
- Alimentos que conteñen ácidos graxos como o Omega-3: peixes como o atún, as sardiñas e o salmón, as noces e outros alimentos enriquecidos en Omega-3 como o leite ou os ovos. Son alimentos que axudan a fortalecer os vasos sanguíneos do oído interno posto que teñen moitas propiedades antiinflamatorias.
- Ácido fólico (Vitamina B): cereais e legumes como os garavanzos ou as lentellas. Estes alimentos axúdanlle ó sangue a fabricar células vermellas e iso fortalecerá a saúde auditiva.
- Vitamina C: froitas como o kiwi, laranxas, tomates, amorodos ou verduras como o brócoli ou as coles de Bruselas. Son alimentos famosos por ser bos para evitar arrefriados, pero tamén inflúen moi positivamente na saúde da nosa audición.
- Vitamina A: verduras de follas verdes como a leituga romana ou a espinaca e hortalizas como a cenoria, o pemento vermello ou a cabaza. Son bos para a saúde do oído interno posto que axudan á formación e mantemento de tecidos brandos e óseos.
- Vitamina E: acelgas, aguacate ou froitos secos como as noces ou améndoas. Esta vitamina ten un efecto antioxidante que nos axuda a eliminar todo o que o noso corpo non precisa e axúdanos a xerar glóbulos brancos. Ademais, estes alimentos son moi bos para evitar ou suavizar a perda de audición asociada á idade.
- Alimentos con Zinc: ameixas, chocolate negro, ostras, cangrexos ou arroz integral. Reforzan as defensas do organismo e protexen o oído retrasando a aparición de perdas de audición.
- Fontes de Magnesio: millo branco, arroz integral, froitos secos ou caracois. O magnesio é bo para prever problemas de audición relacionados ca exposición ó ruído.
Se xa se padecen problemas de audición, unha boa alimentación non fará que se eliminen pero si que axudará moito a suavizar os seus efectos ou a evitar a produción doutros.